Новинарките ширум светот секојдневно се соочуваат со ризици, вознемирување и дискриминација во борбата да ја истакнат вистината, да ја покажат неправдата и да ги засилат маргинализираните гласови. Анализата на Платформата за истражувачко новинарство и анализи – ПИНА, ја открива сериозноста на предизвиците со кои се соочуваат жените новинарки во Македонија.
Над 80 проценти од анкетираните новинарки во земјава биле жртви на некаков вид онлајн вознемирување. Вознемирувањето често доаѓа од анонимни извори, при што дури 79.3% од испитаничките изјавиле дека не го познаваат вознемирувачот, а најчестиот канал за напади е Фејсбук (89.9%).
Но, онлајн насилството е само дел од проблемот. Новинарките често се соочуваат со дискриминација при вработување, каде трудничкиот статус или можноста да станат мајки влијае врз одлуките за нивниот ангажман. Во некои случаи, новинарките биле отпуштени за време на бременост, или им биле понудени договори кои не ги штитат нивните права.
Дополнително, жените во медиумите се соочуваат со нееднаквост во платите, ограничени шанси за напредок и постојан притисок од јавноста и работодавците. Нападите врз нив не се само професионални – тие се и лични, со застрашување и дискриминација кои оставаат длабоки траги.
Сепак, новинарките продолжуваат да бидат во срцето на слободните медиуми. Нивната храброст е од суштинско значење за демократијата, транспарентноста и човековите права.
Промените бараат системски решенија. Секој глас е важен, секоја приказна е дел од мозаикот за подобрување на состојбата. Новинарките и жените во медиумите заслужуваат поддршка, почит и безбедност за да ја продолжат својата мисија во одбрана на вистината.
Вашиот глас е важен. Споделете ги вашите предизвици, бидејќи секоја приказна е важен чекор кон промената.
ИЗВОР: racin.mk
