Москва ќе распореди тактичко нуклеарно оружје во Белорусија, соопшти Путин

Во врска со овој потег тој рече дека нема ништо невообичаено, бидејќи, како што посочи, Соединетите Американски Држави (САД) тоа го прават со децении, распоредувајќи тактичко нуклеарно оружје на териториите земјите сојузнички

Москва и Минск постигнаа договор за распоредување на руско тактичко нуклеарно оружје на територијата на Белорусија, изјави денеска претседателот на Русија, Владимир Путин, пренесува Ројтерс.  

Рускиот претседател, притоа истакна дека распоредувањето се врши без прекршување на обврските на Русија кон меѓународните договори.  

Во врска со овој потег, тој рече дека, нема ништо невообичаено, бидејќи, како што посочи, Соединетите Американски Држави (САД) тоа го прават со децении.  

„Тука нема ништо необично. САД тоа го прават со децении. Долго време го распоредуваат своето тактичко нуклеарно оружје на териториите на своите сојузнички земји…Се договоривме да го сториме истото – без да ги прекршиме нашите обврски, нагласувам, без да ги прекршиме нашите меѓународни обврски за неширење на нуклеарното оружје“,  

рече рускиот претседател.

Путин истакна дека белорускиот претседател Александар Лукашенко долго време го покренувал прашањето за стационирање на тактичко нуклеарно оружје во неговата земја, која се граничи со Полска.  

Според договореното, Русија треба да ја заврши изградбата на складишта за тактичко нуклеарно оружје во Белорусија до 1 јули, оваа година, рече Путин, додавајќи дека Москва нема да ја пренесе контролата врз оружјето на Минск.  

Русија веќе стационирала 10 авиони способни да носат нуклеарно оружје во Белорусија. Како што посочи рускиот претседател, Москва, исто така, веќе префрлила во Белорусија голем број тактички ракетни системи „Искандер“ кои можат да се користат за лансирање на ракети со нуклеарни боеви глави.  

Инаку, Белорусија беше една од точките преку која Русија ја почна инвазијата врз Украина, минатата година. Руските сили од територијата на Белорусија ја стартуваа офанзивата за завземање на украинскиот главен град Киев, операција која заврши неуспешно.  

Во меѓувреме двете земји формираа заедничка воена единица во Белорусија и одржаа бројни вежби. Голем број руски воени авиони и авиони за рано предупредување и контрола се распоредени во Белорусија.