Борбата против корупцијата е приоритет и младите треба да бидат охрабрени да ја препознаат и да станат отпорни на секојдневната корупција. Ова го истакна Вирџинија Елиот претставник на амбасадата на САД, која порача дека младите и младите политички лидери треба да се залагаат и да дадат предлози за подобрување на состојбите во политичките партии.
„Мојот антикорупциски дневник“ е проект кој ги охрабрува младите да ја препознаат и да и одолеат на секојдневната корупција, и да ги следат и да размислуваат како тоа се одразува на нив и луѓето околу нив. Се надеваме дека низ овој проект ќе можеме да видиме млади луѓе повеќе ангажирани и кои се застапуваат за поголема транспарентност и одговорност од Владата“, вели Вирџинија Елиот.
Обвинителката за врски со Европравда Ленче Ристеска верува дека со промоција на етичко лидерство токму кај младите и со тоа започнување нов стандард во владеењето ќе може да се соочиме со предизвиците на корупцијата.
„Впечатокот ми е дека досега многу се зборува за корупцијата, меѓутоа резултатите изостануваат и затоа сметаме дека со адресирање на овој проблем токму кај младите и со јакнењето на нивните капацитети за препознавање и градење на отпорност кон корупцијата дека ќе можеме како општество да имаме навистина значителни резултати во борбата против корупцијата“, порача Ленче Ристеска.
Според судијата Бетим Јахја овие обуки треба да помогнат во борбата против корупцијата која има ендемски размери во нашата држава.
„Се надевам дека со овие обуки ќе постигнеме да изградиме едно поздраво општество, општество во кое ќе владее, правото, правдата, правичноста, а корупцијата како негативна појава да се потисне што е можно повеќе“, вели Бетим Јахја.
Овој проект е поддржан од американската амбасада кое вклучува три еднодневни работилници на кои учесниците ќе развиваат вештини за препознавање и справување со корупцијата.
ИЗВОР: ТВ 21
