Без разлика дали ќе помине или не предлог Законот за бранителите, министерот за одбрана Владо Мисајловски најави дека ќе ги помага припадниците на Армијата кои учествуваа во конфликтот. Во „Клик плус“ на ТВ21, Мисајловски откри дека тоа ќе се случи преку ставки од буџетот на Министерството за одбрана. На прашањето, дали е согласен со закон да се унапреди и положбата на припадниците на ОНА, министерот одговори:
„Не би ги ставил бранителите… сепак бранителите што учествувале во конфликтите е посебен закон овој, но она што јас како министер можам да ви го кажам е дека она што ние го имаме како алатки, како можност за ставки во Министерството, ние ќе ги посветиме сите средства на овие бранители што учествувале во сите конфликти.“, вели Владо Мисајловски.
И покрај тоа што од владиниот партнер ВРЕДИ категорично истакнаа дека предлог законот за бранители на опозициската пратеничка Славјанка Петровска нема да се изгласа, Мисајловски ги остави сите опции отворени.
„Дали овој закон ќе продолжи да се расправа во Собранието, навистина не знам, ќе одлучат пратениците.“, вели Владо Мисајловски.
Европскиот фронт и коалицијата Вреди се согласни дека ќе го блокираат законското решение, особено ако во него не се вклучат и припадниците на ОНА. Блокада повторно имаше на седница на Комисијата за социјална политика, каде предлогот не беше поставен на дневен ред.
„Ваков закон може да се донесе само кога е предвиден и вклучен во законот истиот статус на ветераните на ОНА како што е предвидено за одбранбените сили на земјата“, вели Имерлије Салиу.
„Северна Македонија, неколкупати реков, има само еден буџет, почитувани колеги. Зашто морам да ви кажам, ова треба сите да го знаеме и во ниту еден момент да не се чувствувате загрозени, затоа што не барам да ги платат македонските граѓани, на пример војниците на ОНА, туку нив ќе ги платат граѓаните Албанци.“, вели Илире Даути.
Од СДСМ, чија пратеничка го поднесе законот, претходно истакнаа дека за нив идејата на ВРЕДИ и ДУИ е прифатлива.
ИЗВОР: ТВ 21
