ГАЗА (АА) – Министерството за здравство на Газа го обвини Израел дека сака да ја претвори Индонезиската болница во „масовна гробница“, јавува Анадолу.
Најмалку 12 лица загинаа во израелското гранатирање на болницата во северниот дел на Појасот Газа денес.
Министерството за внатрешни работи во блокираната енклава, исто така, соопшти дека неколку луѓе биле убиени и повредени во израелскиот напад врз раселените лица кои се обиделе да го напуштат објектот.
„Израелската окупација се обидува да ја претвори болницата во масовна гробница како што направија во комплексот Ал-Шифа во градот Газа“, изјави портпаролот на Mинистерството за здравство, Ашраф ал-Кудра, за Анадолу.
Израелската Aрмија минатата недела изврши упад во Ал-Шифа, најголемиот медицински комплекс во Појасот Газа, како дел од нејзината тековна воена офанзива во блокираната енклава.
Ал-Кудра рече дека индонезиската болница е последната оперативна здравствена установа во северниот дел на Појасот Газа.
„Окупацијата се обидува да ги повтори своите дејства од медицинскиот комплекс Ал-Шифа во индонезиската болница, која е столбот на здравствената услуга во северниот дел на Појасот Газа“, рече портпаролот.
Откако Израел почна да ја бомбардира Газа на 7 октомври по нападот на Хамас, според најновите податоци на палестинските власти, загинаа најмалку 13.000 Палестинци, вклучувајќи над 9.000 жени и деца, а повеќе од 30.000 други се повредени.
Илјадници згради, вклучувајќи болници, џамии и цркви, исто така се оштетени или уништени во немилосрдните воздушни и копнени напади на Израел врз опколената енклава.
Израелската блокада, исто така, го прекина снабдувањето на Газа со гориво, електрична енергија и вода, и ја намали испораката на помош на мал број.
Според официјалните податоци, бројот на загинати во Израел изнесува околу 1.200.
