По нападот на израелската војска на позициите што ги користат мировниците на Обединетите нации во Либан, македонските мировници се неповредени и безбедни. Од Министерството за одбрана потврдија за САКАМДАКАЖАМ.МК дека тројцата македонски мировници во Либан се добро.
„Во контакт сме со нашите мировници, кои се стационирани во различни бази“, кажаа од Министерството.
Мисијата на УНИФИЛ објави дека двајца нејзини мировници од Индонезија се повредени кога израелски тенк пукал кон караула во главното седиште на силите во Рас ал-Накура. Притоа била погодена кулата и мировниците паднале.
Извор од Обединетите нации кажа за „Ројтерс“ дека во изминатите 24 часа имало уште два вакви напада, во кои немало жртви.
„Секој намерен напад врз мировниците е грубо кршење на меѓународното хуманитарно право. Во контакт сме со израелската војска“, објави УНИФИЛ.
Внатрешните сили на ОН во Либан моментално имаат околу 10.000 мировници од 50 држави.
ИЗВОР: ТВ 21
