Според белорускиот претседател Минск ќе може да врши контрола над целото нуклеарно оружје што ќе биде распредено на територијата на земјата, што е пак во спротивност со она што го рече претседателот на Русија Владимир Путин при објавувањето на планот дека оружјето ќе остане исклучиво под контрола на Москва
Претседателот на Белорусија Александар Лукашенко во своето годишно обраќање до нацијата го бранеше рускиот план за распоредување на тактичко нуклеарно оружје на белоруска територија, правдајќи го со наводи дека земјата е изложена на зголемени закани од Западот.
Доколку е потребно, рече тој, на територијата на Белорусија треба да бидат распоредени и интерконтинентални балистички ракети.
Инаку, ова е прва пат белорускиот претседател да го коментира ова прашања откако неговиот руски колега Владимир Путин на 25 март го објави планот за распоредување на тактичко нуклеарно оружје во Белорусија.
Лукашенко во своето годишно обраќање до нацијата рече дека планот бил инициран од негова страна, барајќи од Москва да распореди ваков тип оружје и на тој начин да осигура дека Белорусија е способна да го брани својот суверенитет и независност. Сепак, Лукашенко, како што пренесува РСЕ, не посочил докази за какви било конкретни закани од Западот.
„Би сакал да додадам дека целата инфраструктура (за тактичко нуклеарно оружје) е подготвена…Тоа е оружје кое ќе придонесе за нашиот суверенитет и независност“,
рече Лукашенко.
Тој истакна и дека Минск ќе може да врши контрола над целото нукеларно оружје што ќе биде распредено на територијата на Белорусија.
Ова, пак е во спротивност со наводите на рускиот претседател, Путин кој за време на објавувањето на планот рече дека тактичкото нуклеарно оружје што ќе биде распоредено ќе остане под контрола на Москва.
Според воени експерти распоредувањето на оружјето ќе доведе до создавање на постојана руска воена база во Белорусија.
Минск, иако не испрати војници да се борат на фронтовите во Украина заедно со руските сили, и дозволи на Москва да ја користи нејзината територија за лансирање на офанзивата за заземање на Киев на почетокот на инвазијата минатата година што заврши неуспешно.
Исто така, земјата ѝ даде на Русија целосен пристап до нејзините воздушни бази, спроведе заеднички вежби и лекуваше ранети руски војници на нејзина територија.
Поради ова Минск, како и Москва се најде на удар на санкции. Тие дојдоа како дополнување на санкциите што веќе беа наметнати на Минск поради задушувањето на граѓанското општество и спорните избори во 2020 година на кои Лукашенко прогласи победа.
Опозицијата во земјата тврдеше дека изборите биле наместени и дека следеле откако од земјата биле протерани потенцијалните противкандидати на Лукашенко. Многу опозициски политичари и активисти оттогаш беа принудени да ја напуштат земјата или беа затворени.
Говорејќи за руската инвазија на Украина, Лукашенко повика на итни преговори за прекин на огнот „без предуслови“.
„Клучно е да се запре (војната) сега, пред ситуацијата да ескалира. Потребно е да се прогласи примирје и да се забрани снабдување на воените сили со оружје и опрема“,
рече белорускиот претседател.
Тој нагласи дека примирјето не може да се користи за внесување повеќе оружје во конфликтот, бидејќи тоа би можело да ја принуди Русија да го искористи „најстрашното оружје“ доколку се почувствува загрозена.
Поради улогата на Белорусија во конфликтот и нејзините блиски врски со Русија, Украина претходно ги отфрли понудите од Минск да посредува во напорите за постигнување мир.
Извор: 360stepeni.mk
