Лидерот на екстремистите осуден на 18 години затвор за нападот врз Капитол

На денешното рочиште, десничарскиот водач не покажа каење, тврдејќи дека е политички затвореник и инсистирајќи дека „Чуварите на заклетвата“ имале само намера да ги заштитат другите демонстранти

Основачот на екстремно десничарската „Чувари на заклетвата“, Стјуарт Роудс, денеска е осуден на 18 години затвор за неговото учество во нападот на приврзаниците на поранешниот претседател Доналд Трамп врз американскиот Капитол на 6 јануари 2021 година.

Стјуарт Роудс е осуден под обвинение за заговор против државата и други злосторства, пишува Би-би-си. Родос остана надвор од Капитол на 6 јануари 2021 година, но ги координираше паравоените сили кои упаднаа во зградата.

Ова е најголемата казна досега за упад во Капитол. Обвинителите бараа 25 години затвор. Роудс минатата година беше осуден и за попречување на службената постапка и за манипулација со документи.

На денешното рочиште, десничарскиот водач не покажа каење, тврдејќи дека е политички затвореник и инсистирајќи дека „Чуварите на заклетвата“ имале само намера да ги заштитат другите демонстранти.

Во ноември, поротата во Вашингтон ги осуди Роудс (57) и Кели Магс (53), лидер на „Чуварите на заклетвата“ на Флорида врз основа на обвинение за бунтовнички заговор.

Роудс потоа беше прогласен за виновен за организирање повеќенеделен заговор што кулминираше со упадот на неговите следбеници во Капитол, обидувајќи се да го спречат прогласувањето на победата на Џозеф Бајден на претседателските избори во 2020 година.

Роудс, поранешен војник и дипломец од Правниот факултет на Јеил, е првото лице обвинето и последователно осудено за бунтовнички заговор во врска со настаните од 6 јануари 2021 година.