„Колега Крмов, благодарам најпрво за грижата меѓутоа очигледно е дека позади оваа грижа стои интерес како да се освојат ситни политички поени на еден проблем кој што е навистина горлив и на крајот од денот навистина имаме луѓе кои ниту ја разбираат материјата, ниту ја познаваат да ја решаваат истата, а тоа сте вие и Социјалдемократите“, вели Миле Лефков пратеникот од редовите на владејачката ВМРО-ДПМНЕ, зборувајќи за депонијата во Кочани во текот на денешната расправа по поднесените амандманите за Предлог-буџетот за 2025 година на Комисијата за финансирање и буџет.
Лефков појаснува дека впрочем оваа депонија која е всушност диво одлагалиште не гори две годни како што обвинуваат од опозицијата, туку гори цели седум години, факт кој никако не смее да се прескокне и додава дека истата никогаш и не биле подобро уредена до сега.
„Извршена е и механичка и биолошка преработка на депонијата, таа е спремна целосно да ги прими овие количини затоа што конечна цел е да си изгради и да се оди кон регионализација, за што и самите кажавте дека има заеднички повик меѓу Европската комисија и Министерството за финансии, тоа е крајната цел“, прецизен е Лефков.
Според него додека сите во Кочани очекуваат да заврши јавниот повик успешно и депонијата да биде затворена, СДС и Левица се обидуваат да го саботираат бидејќи очигледно не се свесни дека Кочани е котлина околу која гравитираат околните општини и ако има палење на една депонија, ѓубриште, одлагалиште, тогаш ќе има загадување на целата котлина.
„Да ве потсетам дека таа котлина претставува фабрика за храна, едно од најголемите производители на храна во државата за коешто е важно да имаме еколошки одржлива средина и сега вашиот предлог е да инвестираме во депонија којашто треба да биде затворена или реалоцирана. И зошто не кажете уште една вистина дека од кога е владата на ВМРО-ДПМНЕ, за само четири месеци се направи такво уредување коешто никогаш претходно не било направено“, посочува Лефков.
ИЗВОР: kurir.mk
