Специјалниот пратеник на Европската Унија (ЕУ) за дијалогот меѓу Белград и Приштина вели дека целта на предлогот на ЕУ е нормализација, а не капитулација на една од страните. Вели дека целта е да се бара вин-вин ситуација и да се отвори европската врата
Специјалниот пратеник на Европската Унија (ЕУ) за дијалогот меѓу Белград и Приштина, Мирослав Лајчак, во изјава за Српската радио-телевизија (РТС) кажа дека во Косово мора да се формира Заедница на општини со српско мнозинство (ЗСО) и нагласи „ако ја нема Заедницата, нема ниту договор“.
Предлогот на ЕУ, за кој српскиот претседател Александар Вучиќ и косовскиот премиер Албин Курти постигнаа согласност на средбата во Брисел, потенцира Лајчак, говори за нормализација на меѓусебните односи, а не за капитулација. Целта, додаде тој, не е некој да победи или да загуби.
„Целта е да се бара вин-вин ситуација и да се отвори европската врата“,
нагласи специјалниот пратеник на Европската Унија (ЕУ) за дијалогот меѓу Белград и Приштина.
Претстојната средба на 18 март во Охрид, истакна Лајчак, има за цел да се постигне договор за исполнување на договорот што има добиено таква поддршка од ЕУ што не се памети во минатото.
Мирослав Лајчак од понеделникот престојува во Белград, а денеска треба да ги продолжи разговорите со Вучиќ.
Косовскиот премиер Албин Курти во понеделникот изјави дека се разгледуваат 15 модели кои ЕУ ги понудила за формирање на Заедницата. Не сакаше да открие за какви модели станува збор, туку само кажа дека некои модели се воспоставени во европските земји за националните малцинства кои живеат во нив.
Извор: 360stepeni.mk
