Кулеба го брани барањето за касетни бомби, Столтенберг против

Имајќи предвид дека Украина не е потписник на Конвенцијата за забрана за употреба, „правно, нема пречка“ за користење на ова оружје, рече министерот за надворешни работи на Украина на безбедносната конференција во Минхен

Шефот на украинската дипломатија, Дмитро Кулеба, во саботата во Минхен го бранеше повикот за употреба на касетна муниција против руските војници бидејќи Украина не е потписник на Конвенцијата за забрана на употреба на такво оружје, но таквиот повик беше отфрлен од генералниот секретар на НАТО, Јенс Столтенберг.

На маргините на Безбедносната конференција во Минхен, Кулеба го коментираше повикот на украинскиот вицепремиер Олександар Кубраков за снабдување на Украина со касетна муниција и запалива фосфорна муниција, оружје забрането според меѓународното право.

Ниту Украина, ниту Русија ја имаат потпишано Конвенцијата за забрана на употреба на касетна муниција.

„Имајќи предвид дека Украина не е потписник на договорот, ‘правно, нема пречка’ за користење на ова оружје“, изјави Кулеба, а пренесува агенцијата ДПА. Доколку Украина добие оружје што е спорно, тоа ќе се користи исклучиво против вооружените сили на Руската Федерација, додаде тој.

Украина има докази дека Русија користи касетна муниција, рече Кулеба.

Генералниот секретар на НАТО, Јенс Столтенберг, го отфрли барањето за касетна муниција.

„НАТО ниту препорачува, ниту испорачува ваков тип оружје. Доставуваме артилериска и друг вид муниција и оружје, но не и касетни бомби“, изјави Столтенберг за РТЛ/нтв на конференцијата во Минхен.

Столтенберг повтори дека испораката на оружје од западните земји во Украина нема да предизвика ескалација на војната.

Потпретседателката на Соединетите Американски Држави, Камала Харис, во саботата на конференцијата во Минхен првпат ја обвини Русија дека извршила „злосторства против човештвото“ во Украина, за што се собрани и попишани повеќе од 30 000 случаи. Стортелите „ќе одговараат пред суд“, порача таа.