Кремљ: Нашите цели во Украина можеме да ги постигнеме само по воен пат

Досега не се исполнети условите за транзиција на процесот кон мирен пат, изјави Дмитриј Песков

Руските цели во Украина можат да се постигнат само со воени средства, изјави денеска за новинарите Дмитриј Песков, портпарол на рускиот претседател Владимир Путин.

„Досега не се исполнети условите за транзиција на процесот кон мирен пат. За нас апсолутен приоритет продолжува и секогаш ќе биде постигнувањето на нашите цели. Во моментов овие цели можат да се постигнат само со воени средства“,

рече Песков.

Да потсетиме, Кина на крајот на минатиот месец го претстави својот мировен план, но Кремљ тогаш порача дека „нема изгледи за мир“.

„Специјалната воена операција (еуфемизмот на Кремљ за војната против Украина) продолжува, ние продолжуваме да ги постигнуваме однапред одредените цели“,

рече тогаш Песков.