На состанокот, како што изјави премиерот, потенцијално би се разговарало за две теми. Првата, рече Ковачевски, ќе биде во врска со носењето на одлуките кои се потребни за интеграција на Северна Македонија во ЕУ. Во фокус на втората тема, пак, како што кажа, би било усогласувањето на ставовите во врска со односите со сите соседи на државава
Лидерот на СДСМ и премиер, Димитар Ковачевски, најави дека во наредните десетина дена планира да го покани претседателот на опозициската ВМРО-ДПМНЕ, Христијан Мицкоски, на заедничка средба.
На состанокот, како што изјави премиерот, потенцијално би се разговарало за две теми.
Првата – рече Ковачевски – ќе биде во врска со носењето на одлуките кои се потребни за интеграција на Северна Македонија во Европската Унија. Во фокус на втората тема, пак, како што кажа, би било усогласувањето на ставовите во врска со односите со сите соседи на државава.
„Јас планирам да го поканам во текот на наредните 10 дена на средба на која што ќе разговараме за две теми. Првата тема ќе биде околу носењето на одлуки потребни за интеграција на Северна Македонија во Европската Унија и второ, усогласување на ставови за односите со сите соседни држави на Република Северна Македонија“,
изјави Ковачевски одговарајќи на новинарски прашања по посетата на скопскиот Клинички центар.
Ковачевски порача дека сите политички партии во земјава треба да се вклучат во процесот на уставни измени и да бидат свесни оти овој процес е потребен поради интеграцијата на земјава во Европската Унија. Нагласи дека зачленувањето во ЕУ не е процес на еден човек и на една партија туку за сите политички партии и за сите граѓани.
Говорејќи за уставните измени, кои земјава треба да ги направи за да го продолжи евроинтегративниот пат, Ковачевски рече дека очекува уште во понеделник Предлог-иницијативата од работната група за формирање на измените, со која Бугарите и други народи ќе се внесат во Преамбулата од Уставот, да се најде во архивата на Владата, по што истата би се разгледала на владина седница.
„Владата со големо внимание ќе ја разгледа Предлог-иницијативата со оглед на тоа дека во нејзиното подготвување учествуваа професори по уставно право, професори по сродни права на уставното право, претставници од практиката на уставното право и претставници на политички партии. Потоа, согласно процедурата, откако Владата ќе ја разгледа и усвои, ќе ја достави до Собранието на Северна Македонија, бидејќи ова е во моментов најзначаен процес во државата“,
рече Ковачевски.
Додаде дека во вода паднале сите обвинувања од страна на опозицијата оти државава ќе станела бинационална, велејќи оти предлог-иницијативата за уставните измени која ја донела работната група е во согласност со заклучоците на Собранието, со цел исполнување на обврските од преговарачката рамка со ЕУ.
Прашан дали албанските партии ќе го поддржат предлогот, имајќи го предвид нивното барање за бришење на формулацијата „20 отсто“ од Уставот и негова замена со терминот „албански јазик“, Ковачевски не одговори конкретно. Единствено кажа дека меѓународната заедница испратила јасни пораки во врска со спроведувањето на измените во Уставот и обврските кои земјава ги има кон ЕУ.
ИЗВОР: 360stepeni.mk
