Претседателот на Собранието Африм Гаши, се обидува да ги разбуди заспаните пратенички канцеларии, во државата, во кои граѓаните треба да бидат пречекани од пратениците за да ги слушнат и решат нивните секојдневни предизвици. Гаши денеска беше во Охрид за да види како течат контактите меѓу пратениците од овој крај и граѓаните. Од таму тој порача дека непосредниот контакт со пратеникот е една од најважните работи во парламентарната демократија,
„Избраниот пратеник, најдобро е да се види со граѓаните, не само во изборни циклуси, туку и во текот на мандатот. Тоа е смисла на постоење на овие канцеларии, секој петок пратенциите да можат да бидат во контакт со граѓаните. Ние како Собрание се обидуваме да не закажуваме седница“, рече Гаши, кој беше придружуван од охридските пратеници, Сашо Донев, Лидија Петкоска и Грација Бакраческа.
Пратеничките канцеларии произлегуваат од членот 36 од Законот за Собрание, според кој Собранието, во соработка со единиците на локалната самоуправа, обезбедува соодветни услови за остварување на контактите на пратеникот со граѓаните во неговата изборна единица.
„(2) Секој последен ден во работната недела (петок) се определува како ден за контакти на пратениците со граѓаните и избирачите во изборните единици. (3), Собранието во денот определен во ставот (2) од овој член по правило не одржува пленарни седници, седници на работни тела и активности на пратенички групи за соработка со парламенти на други држави, освен во итни и неодложни ситуации. “, пишува во став 2 и 3 од член 36.
Собранискиот спикер, најави дека од минатиот петок ја почнал праксата со посетите на канцелариите и дека ќе ја продолжи и во иднина. Засега има отворено 35 пратенички канцеларии, а според податоците на собранискиот сајт треба да бидат отворени вкупно 75 пратенички канцеларии.
ИЗВОР: racin.mk
