Кинескиот претседател следната недела во тридневна посета на Москва

За време на разговорите ќе бидат разгледани актуелните прашања за понатамошен развој на сеопфатните партнерски односи и стратешката соработка меѓу Русија и Кина, соопшти Кремљ

Кинескиот претседател Си Џинпинг од 20 до 22 март ќе престојува во официјална посета на Русија, на покана на неговиот руски колега Владимир Путин, соопшти денеска Кремљ.

Посетата на Си доаѓа откако Кина се понуди да посредува во постигнувањето мир во Украина, што од страна на Западот беше дочекано со скептицизам имајќи ја предвид поддршката на Пекинг за Русија.

„За време на разговорите ќе бидат разгледани актуелните прашања за понатамошен развој на сеопфатните партнерски односи и стратешката соработка меѓу Русија и Кина“,

соопшти Кремљ.

Во соопштението се додава дека за време на посетата ќе бидат потпишани голем број важни билатерални документи.

Кина и Русија во февруари 2022 година склучија партнерство „без ограничувања“, за време на посетата на рускиот претседател на Пекинг на отворањето на Зимските олимписки игри, неколку недели пред Русија да ја нападне Украина.

Оттогаш двете страни продолжија да ја потврдуваат силата на нивните врски.

Трговијата меѓу двете земји бележи зголемување по инвазијата врз Украина, а Кина е најголемиот купувач на руска нафта и клучен извор на приходи за Москва.

Кина никогаш не ја поддржа или јавно не ја критикуваше руската офанзива и постојано ја изразува својата поддршка за Москва во врска со западните санкции.

На 10 март кинескиот претседател Си Џинпинг обезбеди трет петгодишен претседателски мандат откако речиси 3 000 члена на кинескиот парламент му ја дадоа поддршката.

Лани во октомври на Џинпинг му беа доделени уште пет години како шеф на кинеската комунистичка партија и на војската – двете позначајни лидерски позиции во кинеската политика.

Почетокот на неговиот трет претседателски мандат доаѓа кога Кина, втората по големина економија во светот, се соочува со големи предизвици – од човековите права, закрепнување од политиката за нулта-ковид, слабата глобална побарувачка, кревката доверба меѓу потрошувачите и бизнисите, па сè до затегнатите односи со Вашингтон и Западот поради Тајван, како и поддршката за Русија.