Јапонија ќе го отвори првото казино

Јапонија се смета за земја која нуди ветувачки пазар за развој на „коцкарската индустрија“. Таа е трета по големина економија во светот со население од околу 126 милиони жители, а во нејзин прилог оди и што може да ги привлече љубителите на коцкањето од регионот ако се има предвид дека во соседна Кина единствено во градот Макао казината се легални. Тие во Јапонија одамна се нелегални, а најавеното отворање е благодарение на закон кој беше донесен во 2018 со којшто се предвидуваат исклучоци

Јапонските власти дадоа зелено светло за контроверзните планови за изградба на првото легално казино во земјата.

Станува збор за комплекс кој ќе се простира на површина од 49 хектари, а покрај казиното во него ќе има и хотел, конференциска сала, трговски центар и музеј. Треба да се отвори во градот Осака во 2029 година.

„Се надевам дека ќе стане туристичка база која ќе ги промовира убавините на Јапонија пред светот“,

очекува премиерот Фумио Кишида.

Почетната инвестиција за овој проект е 13,5 милијарди долари, а како инвеститори се јавуваат американскиот казино оператор МГМ и јапонската групација „Орикс“ кои имаат по 40 отсто во сопственичкиот удел. Останатите 20 отсто се во сопственост на три локални компании со седиште во Осака.

Очекувањата се дека овој комплекс со казино ќе привлекува околу 20 милиони посетители годишно и ќе донесе големи економски придобивки за регионот.

Овој проект во Јапонија беше предложен пред неколку години, но се одложи поради ковид-пандемијата и корупциски скандал во кој беше вмешан пратеник од владејачката партија кој беше обвинет за примање мито.

Сличен план има и за Нагасаки.

Јапонија се смета за земја која нуди ветувачки пазар за развој на „коцкарската индустрија“. Таа е трета по големина економија во светот со население од околу 126 милиони жители, а во нејзин прилог оди и што може да ги привлече љубителите на коцкањето од регионот ако се има предвид дека во соседна Кина единствено во градот Макао казината се легални.

Казината во Јапонија одамна се нелегални. Но, во 2018 година беше донесен закон кој предвидува исклучоци за одредени игри на среќа, а целта на законските измени беше да се создадат нови работни места и да се поттикне туризмот. Јавното мислење во земјата е поделен, а негодувачите се загрижени дека со отворањето на казина може да се зголеми криминалот, но и зависноста од коцкање.