ТЕЛ АВИВ (АА) – И покрај најавите на израелскиот премиер Бенјамин Нетанјаху дека се одложени реформите во судството, вчера во Тел Авив продолжија протестите против планот на израелската Влада, пренесува Анадолу.
Илјадници демонстранти од сите возрасти се собраа во улицата „Елиезер Каплан“ во центарот на Тел Авив.
Носејќи израелски знамиња, демонстрантите извикуваа слогани, како што се „Не за диктатурата“ и „Демократија“.
Протестите следуваа по вчерашниот вооружен напад во Тел Авив во кој загина едно лице, а најмалку шест се повредени.
Последните неколку недели во Израел се одржаа серија масовни протести предизвикани од владините планови за реформи во судството, што опозицијата ги смета како обид за намалување на овластувањата на судството во корист на извршната власт.
Нетанјаху меѓутоа инсистираше на реформите потенцирајќи дека неговите судски планови ќе ја унапредат демократијата и ќе ја вратат рамнотежата меѓу законодавната, извршната и судската власт.
Сепак, Нетанјаху, на кого му се суди за корупција, попушти пред притисоците и најави привремено суспендирање на плановите за реформи во судството.
Извор: www.aa.com.tr
