ГАЗА (АА) – Израелските сили продолжија со нападите врз Појасот Газа и денес, четврти ден по ред, со што вкупниот број на загинати од воздушните напади се искачи на 31, меѓу кои има шест деца и три жени, јавува Анадолу.
Палестинското Министерство за здравство соопшти дека во последните четири дена во воздушните напади на израелските сили загинале 31 лице, меѓу кои шест деца и три жени, а 93 лица, од кои 32 деца и 17 жени, се повредени.
Во израелските напади врз Газа загинаа и петмина високи припадници на движењето „Исламски џихад“.
Претходно, утринава, израелската Армија го уништи домот на палестинското семејство Башир додека израелските напади на различни локации во јужниот дел на Појасот Газа продолжуваат.
Вооружените палестински фракции возвратија со истрелување гранати врз израелските воени точки во непосредна близина на Појасот Газа.
Националната итна медицинска служба на Израел, Маген Давид Адом, извести дека ракета истрелана од Газа погодила станбена зграда во централниот израелски град Реховот, при што загинало едно, а повредени биле пет лица.
Регионалните и меѓународните сили побараа итен прекин на огнот меѓу Израел и Палестина.
Израелската војска соопшти дека воздушните напади се дел од нејзината операција „Штит и стрела“, офанзива започната откако беа истрелани ракети од Газа по смртта на палестинскиот затвореник кој штрајкуваше со глад во израелски затвор.
Според палестинските податоци, од почетокот на годината над 160 Палестинци го загубиле животот во нападите на израелските сили. Најмалку 20 Израелци загинаа во напади во истиот период.
Извор: www.aa.com.tr
