Израелскиот Кабинет ќе гласа за договорот за прекин на огнот во Либан

ЕРУСАЛИМ (АА) – Израелскиот Кабинет треба да се состане денес за да гласа за предлогот за прекин на огнот со Либан, поддржан од САД, објавија израелските медиуми, пренесува Анадолу.

Израелскиот јавен сервис КАН соопшти дека премиерот Бенјамин Нетанјаху има намера да го одобри договорот за прекин на огнот со Либан преку Кабинетот за безбедност, а не преку Владата.

КАН рече дека за одобрување на договорот не е потребна согласност од Кнесетот (израелскиот Парламент).

Се очекува американскиот претседател Џо Бајден и неговиот француски колега Емануел Макрон да го објават договорот меѓу Израел и Либан за 60 дена во рок од 36 часа.

Сепак, КАН, повикувајќи се на израелски функционер, договорот го нарече „кревок“.

„Ова не е крај на војната, ова е договор за прекин на огнот што ќе се тестира секојдневно“, рече изворот.

Договорот за прекин на огнот вклучува механизам за следење со учество на САД и Франција, заедно со можност за приклучување во Велика Британија, според КАН.

Според договорот, Хезболах ќе се повлече на север од реката Литани во согласност со резолуцијата 1701 на ОН со која заврши израелско-либанската војна во 2006 година, објави телевизијата.

Израелските медиуми рано утринава објавија дека се очекува во рок од два дена да биде објавен договор за прекин на огнот меѓу Израел и Хезболах.

Либанскиот парламентарец Касем Хашем, исто така, вчера изјави дека договорот за прекин на огнот меѓу Хезболах и Израел е при крај и може да биде прогласен во следните 36 часа, доколку преговорите продолжат непречено.

„Атмосферата е позитивна, а разговорите за прекин на огнот достигнаа напредна фаза. Прашање е само на часови пред да се финализира договорот и да се објави доколку напредокот продолжи како што се очекуваше“, изјави Хашем за Анадолу.

Израел ги засили своите воздушни напади врз Либан против, како што тврди, локации на Хезболах, како дел од едногодишната војна против либанската група од почетокот на војната во Газа минатата година.

Според либанските здравствени власти, во израелските напади врз Либан убиени се повеќе од 3.760 луѓе, речиси 15.700 се повредени и над еден милион се раселени од октомври минатата година.

На 1 октомври оваа година Израел го прошири конфликтот со копнен напад врз Јужен Либан.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.