КУДС (ЕРУСАЛИМ) (АА) – Израелскиот министер за национална безбедност од крајната десница, Итамар Бен-Гвир, изјави дека од 7 октомври минатата година на Израелците им биле поделени над 120.000 парчиња оружје и дека вооружувањето ќе продолжи, јавува Анадолу.
„Повеќе од 120.000 парчиња оружје им се поделени на граѓаните што ги исполнуваат условите, а уште десетици илјади добија условно одобрение“, напиша Бен-Гвир на платформата X.
Тој наведе дека отвориле повеќе од 900 нови оддели за да обезбедат обука за оружје за илјадници верски, секуларни, десничарски и левичарски доброволци низ Израел.
„Добивме безброј критики, но одлучни сме и имаме намера да продолжиме да го вооружуваме Израел“, рече Бен-Гвир.
Тој тврди дека сѐ додека израелските заробеници во Газа не се вратат дома, ќе продолжат да работат со сите сили за да постигнат целосна победа во Појасот Газа, Либан, Иран, Западниот Брег и на други места „каде што газат нивните непријатели“.
И покрај влошената ситуација на либанската граница, Бен-Гвир рече:
„Израелците на северот сигурно ќе се вратат во своите градови.“
Министерот за национална безбедност на Израел од крајната десница спроведува политика на вооружување на Израелците околу Појасот Газа, Западниот Брег и либанската граница од октомври 2023 година, кога почнаа израелските напади врз Газа.
Извор: Anadolu Agency (AA)
