Министерот за правда, Игор Филков, на прашањето до каде е постапката за екстрадицијата на Алил Демири и Африм Исмаиловиќ, кои македонските судови ги осудија на доживотна казна затвор за случајот ,,Монструм”, рече дека „процедурата е во тек а на исходот се чека во секој момент“ и дека „кога ќе дознаеме ние, ќе дознаете и вие“.
Неодмна по владината седница меѓу македонската и косовската влада во Приштина, премиерот на Косово, Албин Курти, рече дека прашањето е за судовите и јавните обвинителства на Македонија и Косово, и дека треба да им се даде уште малку време.
„Ние сме во ситуација кога имаме наследено старо прашање и тоа налага законски и судски третман за што нашите двајца министри даваат максимум за што поскоро да се реши. Да им дадеме уште малку време да го решат и да се погрижат за проблемот“, кажа Курти на заедничката прес-конференција со неговиот македонски колега Христијан Мицкоски.
Летово Министерството за правда повторно бара екстрадиција од Косово. Барањата се веќе доставени до Министерството за правда на Косово и се уште се чека одговор од нивна страна.
Екстрадиција беше побарана во 2018 година. Во 2021 година косовските власти ја одбија екстрадицијата за Исмаиловиќ, а за Демири немаше одговор.
Во судскиот процес за случајот познат како „Монструм“, на доживотен затвор беа осудени Алил Демири, Африм Исмаиловиќ и Агим Исмаиловиќ. Обвинетиот Фејзи Азири доби 15 години затвор, а Хаки Азири 9 години. Ослободителна пресуда поради недостиг на докази доби единствено обвинетиот Сами Љута. Исмаиловиќ и Демири се обвинети дека се двајца од тројцата непосредни извршители на убиствата кај Смилковско езеро.
На 12 април 2012 година, е извршено убиството на петмина лица со огнено оружје кај езерото во атарот на селото Смилковци, близу Скопје. Убиените се четири момчиња на возраст од 18 до 21 година од населбата Радишани: Филип Славковски, Александар Наќевски, Цветанчо Ацковски и Кире Тричковски, како и Борче Стевковски, 45 години, од селото Црешово. Обдукцијата врз убиените покажало дека во нив е пукано од три типа огнено оружје, зашто се најдени чаури од три различни типа муниција, што сугерира дека има повеќе од еден извршител на чинот. Убиството се случи во времето на големиот христијански празник Велигден.
ИЗВОР: racin.mk
