Македонија е меѓу 79-те држави кои изразија поддршка за независноста и непристрасноста на Меѓународниот кривичен суд (МКС), откако американскиот претседател Доналд Трамп воведе санкции против оваа институција.
Според објавата на Министерството за надворешни работи на Холандија, потписниците на заедничката изјава го нагласуваат значењето на Судот во борбата против неказнивоста за најтешките меѓународни злосторства.
„Судот служи како витален столб на меѓународниот правосуден систем со тоа што обезбедува одговорност за најтешките меѓународни злосторства и правда за жртвите“, се вели во документот.
Од земјите во регионот, поддршка за изјавата дале сите соседи на Македонија, со исклучок на Србија. Меѓу земјите членки на ЕУ кои не се потписници се Унгарија, Чешка и Италија.
Во заедничката изјава, потписниците предупредуваат дека санкциите на Трамп го зголемуваат ризикот од неказнивост за сериозните злосторства и го поткопуваат меѓународното владеење на правото. Исто така, се нагласува дека тие може да ја загрозат доверливоста на чувствителните информации и безбедноста на инволвираните страни, вклучително жртви, сведоци и судски службеници.
„Како силни поддржувачи на МКС, жалиме за сите обиди да се поткопа независноста, интегритетот и непристрасноста на Судот. Ние сме посветени на обезбедување на континуитетот на неговата работа за да може ефикасно и независно да ги извршува своите функции“, стои во документот.
Извршната наредба на Трамп предвидува финансиски и визни санкции против поединци кои му помагаат на МКС во истрагите против американски државјани или сојузници на САД. Овој потег доаѓа откако демократите во Сенатот ја блокираа иницијативата на републиканците за санкционирање на Судот, предложена како одговор на налозите за апсење на израелскиот премиер Бенјамин Нетанјаху и неговиот поранешен министер за одбрана поради воената кампања во Појасот Газа.
ИЗВОР: racin.mk
