Новиот директор на Агенцијата за национална безбедност (АНБ), Бојан Христовски, во интервју за емисијата „Код“ на ТВ Телма истакна дека со неговото именување на функција, не е прекршен законот.
Според него, тој навреме се отчленил од ВМРО-ДПМНЕ.
„Согласно законот, не е дозволено членување во политички партии за ниту еден од вработените. Исто како што е во МВР. Во моментот на моето именување и претходно при моето, условно кажано, враќање во МВР во декември 2023 година, односно одреден период претходно, со пополнување формална изјава, со барање до политичката партија ВМРО-ДПМНЕ, се изземав, односно се отчленив, од партијата“, вели Христовски.
На новинарско прашање за тоа како ќе постапи доколку му се јави доскорашниот партиски шеф, а сегашен премиер и побара нешто да направи како директор на АНБ, Христовски порача дека секогаш бил самостоен во своето работење и одлучување, па затоа се ште е во рамки на законот ќе биде изработено строго во рамките на законот и подзаконските акти на АНБ.
„Луѓе може да бараат, може да има секакви побарувања. Тоа што ќе биде преземено од моја страна и донесено како одлука секако секогаш ќе биде во рамките на правилата тука, на законските прописи и во склоп на вредностите на оваа држава односно темелите на кои ние се потпираме, а тоа е припадност кон НАТО-алијансата и вредностите на Европската Унија“, рече тој.
Христовски рече дека иако неговите претходници ова не го вовеле, сепак негов приоритет ќе биде секој вработен да помине полиграф како средство за проверка на професионалноста и кредибилноста.
ИЗВОР: ТВ 21
