КУДС/ЕРУСАЛИМ (АА) – Израелскиот премиер Бенјамин Нетанјаху синоќа на полноќ го потврди ослободувањето на 13 израелски заложници од втората група во рамките на договорот за размена на заробеници со палестинската група на отпорот, Хамас, пренесува Анадолу.
„Владата на Израел ги пречекува 17-те заложници кои се враќаат во Израел“, се вели во соопштението на Кабинетот на Нетанјаху. Во него се додава дека „13 наши државјани и четворица тајландски државјани, се на пат кон израелска територија“, беше објавено синоќа.
Во соопштението се повторува израелскиот став и посветеноста за ослободување на сите „заложници и исчезнати“ од Газа.
Израелската војска потоа соопшти дека ослободените заложници „се на израелска територија и се придружувани од (израелските) специјални сили“.
Во меѓувреме, Меѓународниот комитет на Црвениот крст (МКЦК) го потврди ослободувањето на 17 заробеници (израелски и тајландски државјани) кои беа држени во Газа.
Израелската страна ослободи 39 затвореници од израелските затвори во втората размена, меѓу кои шест жени и 33 малолетни лица.
Според договорот, заложниците и затворениците ќе бидат ослободувани во групи во текот на четирите дена од хуманитарната пауза.
Израел започна масовна воена кампања во Појасот Газа по прекуграничниот напад на Хамас на 7 октомври.
Оттогаш во израелските напади загинаа најмалку 14.854 Палестинци, од кои 6.150 деца и над 4.000 жени, според здравствените власти во енклавата.
Бројот на загинати во Израел, според официјалните податоци, изнесува 1.200.
