МОСКВА (АА) – Руски дипломат изјави дека некои земји од Централна Азија би можеле да се приклучат на санкциите на западните земји против Москва, јавува Анадолу.
„Дури и додека го делиме ставот дека едностраните економски ограничувања се неприфатливи и нелегитимни, некои централноазиски држави сè уште не сакаат да преземаат ризици и укажуваат дека се подготвени да се усогласат со рестриктивните мерки на Западот“, рече рускиот заменик-министер за надворешни работи, Михаил Галузин, во говорот на Централноазиската конференција во градот Томск, Русија.
Галузин рече дека Русија никому не диктира каква надворешна или внатрешна политика треба да води, освен ако не е во спротивност со меѓусебните обврски, вклучително и оние во рамките на Организацијата на Договорот за колективна безбедност, Евроазиската економска унија и Комонвелтот на независни држави.
„Убедени сме дека тоа е сосема јасно видливо и разбрано во главните градови на Централна Азија. Вештачкото уништување на врските со Русија може да резултира со посериозна штета од трошоците што би ги предизвикале санкциите“, рече Галузин.
Галузин рече дека Русија е фокусирана на зајакнување на стратешкото партнерство со државите од Централна Азија.
„Западните земји ја гледаат централна Азија само како инструмент за задржување на Русија и Кина“, рече рускиот заменик-министер за надворешни работи.
Извор: www.aa.com.tr
