Пратениците преку транспаренти ја прашаа премиерката што е смешно покажувајќи ја фотографијата што таа ја објави со Вучиќ и Мали и со која се исмеваше со масовните протести
Група пратеници од неколку опозициски партии во парламентот на Србија, стана и извади транспаренти во моментот кога премиерката Ана Брнабиќ почна да говори на собраниска седница.
На транспарентите беше испечатена фотографијата (селфи) на Брнабиќ со претседателот Александар Вучиќ и министерот за финансии Синиша Мали со која таа на социјалните мрежи се исмеваше со протестите „Србија против насилството“.
Како што пренесува Н1 ТВ, револтот пратениците го искажаа за време на седница на која се разгледува извештајот на Владата за трагичните настани во Србија, извештајот на Регулаторното тело за електронски медиуми за кое демонстраторите бараа смена на членовите, а меѓу точките на седницата е и иницијативата за формирање анкетна комисија во парламентот за масовните убиства, како и смена на министерот за внатрешни работи Братислав Гашиќ.
По двата масакри, во Белград се одржаа два протести (на 8 и 12 мај) организирани од дел од опозицијата. Протестите имаа масовна посетеност додека власта тврдеше дека биле малубројни.
За време на вториот протест на 12 мај, за кој се проценува дека бил најмасовниот во последните 10 години во Србија, премиерката објави фотографија со Вучиќ и Мали на која со фотомонтажа тројцата беа прикажани по три пати. Покрај фотомонтажата Брнабиќ напиша и коментар: „Нè има ногу повеќе од минатиот пат. Уште малку па ќе идеме на ’Газела‘“ („Газела“ е еден од најпознатите мостови во Белград и една од најважните сообраќајници и беше блокирана за време на протестот).
Извор: 360stepeni.mk
