БРИСЕЛ (АА) – Претседателката на Европската комисија, Урсула фон дер Лајен, објави дека територијалниот интегритет на Сирија е од клучно значење по падот на режимот на Башар ал Асад, известува Анадолу.
Таа истакна дека телефонски разговарала со јорданскиот крал Абдула Втори, а ќе разговара и со другите регионални лидери за најновите случувања.
Фон дер Лајен истакна дека од клучно значење се територијалниот интегритет на Сирија и заштитата на малцинствата.
„Со оглед на променливата ситуација, ние ќе останеме во близок контакт. Ќе разговарам и со другите регионални лидери денес и во наредните денови“, рече таа.
Во соопштението по падот на режимот на Асад, Европската унија (ЕУ) изјави дека е задоволна од ситуацијата и дека е подготвена да преземе улога во обновата на земјата, со зачувување на нејзиниот територијален интегритет.
Сирија веќе 13 години е сцена на граѓанска војна, а по период на релативно затишје, на 27 ноември повторно избувнаа судири меѓу силите на режимот на Асад и антирежимските групи во руралните подрачја западно од Алепо.
Опозициските сили потоа започнаа молскавична офанзива и за десет дена ги освоија клучните градови, што заврши со вчерашното заземање на главниот град Дамаск.
Руското Министерство за надворешни работи во неделата објави дека самиот Башар ал Асад донел одлука да се повлече од власт и да ја напушти Сирија. Подоцна беше објавено дека Асад и неговото семејство пристигнале во Москва, а Русија им дала азил.
Извор: Anadolu Agency (AA)
