Фон дер Лајен: ЕУ ќе организира конференција за руското киднапирање деца од Украина

Во партнерство со Украинците, полскиот премиер Матеуш Моравјецки и јас покренавме иницијатива за враќање на децата киднапирани од Русија, рече Фон дер Лејен на прес-конференција

Европската Унија ќе организира конференција за лоцирање на децата од Украина кои беа киднапирани од Русија и ќе ги врати во нивната татковина, најави во Брисел претседателката на Европската комисија, Урсула фон дер Лајен.

„Тоа е страшно потсетување на најмрачните периоди од нашата историја, на депортациите на децата што се случуваат таму. Тоа е воено злосторство. Знаеме дека 16.200 деца беа депортирани, само 300 од нив се вратија“,

изјави претседателката на ЕК по самитот во Брисел.

Во партнерство со Украинците, полскиот премиер Матеуш Моравјецки и јас покренавме иницијатива за враќање на децата киднапирани од Русија, рече Фон дер Лејен на прес-конференција.

„За таа цел ќе организираме конференција (…) сакаме да извршиме меѓународен притисок за да ги преземеме сите можни мерки за пронаоѓање на овие деца“,

изјави таа по завршувањето на првиот ден од дводневниот самит на 27-те земји-членки на Унијата.

На редовниот пролетен состанок кој започна со работен ручек со генералниот секретар на ОН Антонио Гутереш за клучните геополитички и глобални предизвици, лидерите на земјите-членки на ЕУ во четвртокот ја поддржаа одлуката за итно испраќање милион парчиња артилериска муниција во Украина преку заедничка набавка.

Минатата недела Меѓународниот кривичен суд (МКС) издаде налог за апсење на рускиот претседател Владимир Путин под обвинение дека е одговорен за нелегална депортација на деца и илегално пренесување на луѓе од територијата на Украина во Руската Федерација.

МКС, исто така, издаде налог за апсење на Марија Лавова-Белова, руски комесар за правата на децата, под истите обвиненија. Русија никогаш не го криеше фактот дека однесе илјадници украински деца во Русија, што го оправда со спроведување на хуманитарна акција за заштита на сирачињата и напуштените деца во зоната на конфликтот.

Украина, од друга страна, тврди дека илјадници депортирани украински деца се посвоени од руски семејства, сместени во кампови и сиропиталишта, дека на децата им се даваат руски пасоши и се воспитуваат да го одбијат украинското државјанство.