ЊУЈОРК (АА) – Американската фармацевтска компанија Фајзер ја купи биотехнолошката компанија Сиген за да го прошири своето портфолио за лекување на рак, јавува Анадолу.
Во соопштението на Фајзер се наведува дека глобалната биотехнолошка компанија Сиген е купена за речиси 43 милијарди долари во оперативна вредност или 229 долари во готово по акција.
Се додава дека откупот бил одобрен од управните одбори на двете компании.
Како што се наведува во соопштението, очекуваат по купувањето на компанијата Сиген, приходите на Фајзер во 2030 година да се зголемат за повеќе од 10 милијарди долари.
Фајзер моментално има портфолио од 24 одобрени иновативни лекови против рак, вклучувајќи ги и најпродаваните лекови и третмани против рак на дојка и рак на простата.
Во соопштението се наведува дека со купувањето на компанијата Сиген, Фајзер значително ја зацврстила својата позиција во оваа област.
Фајзер е американска мултинационална фармацевтска и биотехнолошка корпорација со седиште во Менхетен, Њујорк.
Компанијата е основана во 1849 година во Њујорк од двајца германски претприемачи, Чарлс Фајзер и неговиот братучед Чарлс Ф. Ерхарт.
Фајзер развива и произведува лекови и вакцини за имунологија, онкологија, кардиологија, ендокринологија и неврологија.
Извор: www.aa.com.tr
