БЕРЛИН (АА) – Екстремно десничарската партија АфД освои најмногу гласови во пет сојузни покраини во источна Германија на неделните избори за Европскиот парламент, што е одраз на растечката политичка поделба во земјата, јавува Анадолу.
Според прелиминарните резултати, оваа антиимигрантска партија освоила 31,8 отсто од гласовите во Саксонија, 30,7 отсто во Тирингија, 30,5 отсто во Саксонија-Анхалт, 28,3 отсто во Мекленбург-Западна Померанија и 27,5 отсто во Бранденбург.
Поддршката за АфД во поранешните комунистички покраини на Источна Германија беше значително повисока од нејзиниот резултат остварен на национално ниво од 15,9 отсто.
Тоа беше најдобриот резултат на АфД досега за Европскиот парламент, што ја прави втора по големина партија во Германија.
Излезните анкети покажаа дека повеќето гласачи на АфД се загрижени за нивната економска благосостојба и бараат посилни мерки за запирање на нерегуларната миграција.
Дури 94 отсто од гласачите на АфД изразија загриженост дека влијанието на исламот во Германија „станува премногу силно“.
Според репрезентативната анкета на јавниот емитер АРД, 51 отсто од оние што гласале за АфД изјавиле дека веруваат во политиката што ја води оваа партија. Околу 44 отсто од испитаниците рекле дека гласале за АфД поради протест или разочарување од другите партии.
АфД беше вмешана во голем број скандали во последниве години, вклучително и таен состанок на нејзините највисоки функционери заради планирање масовни депортации на имигранти, што предизвика сомнеж за посветеноста на партијата кон демократските вредности.
Германската домашна разузнавачка агенција го надгледуваше младинското крило на АфД и различни ограноци поради сомневање за антидемократски аспирации во партијата.
Во последниве години, истакнати членови на партијата предизвикаа контроверзии со нивните антиимигрантски, антисемитски и исламофобични забелешки. Критичарите ја обвинуваат АфД дека поттикнува ксенофобија и антимуслимански расизам во Германија.
Извор: Anadolu Agency (AA)
