Едно лице загина во верижниот судир во Унгарија – полицијата го пронашла под опожарен автомобил

Иако првично беше објавено дека во несреќата се повредени 36 лица, обновениот полициски извештај говори дека во масовниот судир се повредени 39 лица. Дванаесет лица се тешко повредени, а двајца се во животна опасност. Според унгарската полиција, 25 од повредените се малолетни лица

Едно лице загина во вчерашниот масовен верижен судир во кој учестуваа 42 возила на автопат кон Будимпешта.

Според извештајот на унгарската полиција, се работи за маж на 44-годишна возраст.

Тој бил пронајден под еден од опожарените автомобили кои се запалиле при судирот.

„Во несреќата 44-годишен маж го загуби животот. При отстранување на остатоците од еден од опожарените автомобили е пронајдено загинато лице. Во моментов е во тек увидот на местото на настанот“,

се наведува во полициското соопштение.

Иако првично беше објавено дека во несреќата се повредени 36 лица, обновениот полициски извештај говори дека во масовниот судир се повредени 39 лица. Дванаесет лица се тешко повредени, а двајца се во животна опасност. Според унгарската полиција, 25 од повредените се малолетни лица.

Вчерашниот масовен верижен судир во кој учестуваа 42 возила, од кои пет камиони и 37 автомобили, се случи околу 14:25 часот во близина на селото Херцегалом на делницата од автопатот М1 од страната што води до главниот град на Унгарија.

Унгарската полиција информира дека нејзините екипи учествувале во спасувањето и во увидот на местото на настанот до 5:10 часот утринава.

Автопатот каде што се случи несреќата сега е отворен и во двата правци.

Во меѓувреме се истражуваат околностите и причините за несреќата со учество на вештаци.

Се претпоставува дека причина за несреќата бил силен ветер кој со себе носел прашина и со тоа била намалена видливоста, но засега нема официјална потврда за ваквите наводи.