Откако за 11 декември е закажана седницата на која Уставниот суд ќе одлучува за Законот за јазиците, од опозицијата пристигнаа бројни реакции, главно критики и обвинувања кон власта.
На изјавите од опозицијата реагираше и претседателот на Движењето Беса, Билал Касами, кој изјави дека додека беа на власт (н.з мислејќи на ДУИ), не се интересирале за албанските прашања, но сега, кога дојде време за одговорност, го менуваат пристапот. Касами истакна дека, кога станува збор за албанските прашања, „нека спијат мирно“, бидејќи, како што вели, тие се во сигурни раце, заштитени од вистинските албански чувари.
„Денес, кога на Али Ахмети и неговите блиски им се затвори чешмата од државниот буџет, одеднаш се сетија на албанските прашања, меѓу кои и прашањето за албанскиот јазик! 22 години на власт, Али Ахмети не се интересираше ниту за јазикот, ниту за знамето, ниту за невините затвореници во случајот „Монструм“, ниту за поранешните борци на УЧК, ниту за ништо што е албанско. Затоа што во тоа време, тој се грижеше само како да ги збогати своите блиски и како да купат трговски центри, како што е Соравиа!“, вели Касами.
Додека тој се збогатуваше, албанските прашања и Албанците паднаа на најниско ниво, дури полошо од времето на Милошевиќ, додава Касами.
„Сега, кога дојде времето за одговорност и кога корумпираните од ДУИ треба да се подготвуваат за затвор, Али Ахмети одеднаш се сети на албанските прашања. Јас ви велам дека, кога станува збор за националните прашања, Али Ахмети и неговите соработници можат да спијат мирно, бидејќи албанските прашања се во сигурни раце, заштитени од вистинските албански чувари. Но, ако не можат да спијат поради злосторствата што ги направиле, тогаш со жалење велам дека не можеме да им помогнеме, но исто така нема да ги спасат ниту нивните планови за дестабилизација. ВРЕМЕ Е ЗА ОДГОВОРНОСТ“, изјави Билал Касами.
Првиот вицепремиер на Владата, Изет Меџити, запрашан за седницата на уставниот суд, рече дека законот за употреба на јазиците произлегува од Охридскиот договор и кој ќе го чепне овој договор влијае на меѓуетничките односи во Северна Македонија.
„Ги повикувам и институциите и граѓаните да бидат со ладна глава за оваа работа. Го поканувам и Уставниот суд да го гледа ова како политичко, а не само правно прашање, бидејќи законот за јазиците произлегува од Охридскиот договор, кој е столб на оваа држава, новиот устав е изграден врз Охридскиот договор. Секој што влијае на Охридскиот договор влијаел на меѓуетничките односи и на стабилноста на оваа држава“, вели Изет Меџити.
ИЗВОР: ТВ 21
