ИСТАНБУЛ (АА) – Тековната тензија на Црвеното Море се очекуваше да влијае врз поморското движење во Суецкиот Канал во Египет поради заканите од јеменската група Хути дека ќе ги гаѓа бродовите поврзани со Израел, особено во близина на теснецот Баб ал-Мандаб, јавува Анадолу.
Сепак, според неодамнешните официјални податоци објавени од Управата на Суецкиот Канал, 2.264 брода го преминале каналот во двете насоки во ноември 2023 година, во споредба со 2.171 брод во ноември минатата година, што покажува зголемување од 4,3 отсто.
Податоците покажаа дека се пренесени 135,5 милиони тони материјал наспроти 125,2 милиони тони во ноември минатата година, со што се бележи зголемување од 8,2% отсто.
Од друга страна, приходите од Суецкиот Канал се зголемиле во ноември за 20,3 отсто, на 854,7 милиони долари наспроти 710,3 милиони долари во истиот период минатата година.
Во неделата, јеменската група Хути соопшти дека таргетирала два израелски брода во теснецот Баб ал-Мандаб во Црвеното Море со поморска ракета и беспилотно летало.
Во неделата Пентагон објави дека американски воен брод и неколку трговски бродови биле нападнати на Црвеното Море.
На 19 ноември Хутите објавија запленување на товарниот брод Галакси Лидер, кој бил во косопственост на израелска компанија.
Групата рече дека овој чекор доаѓа во знак на солидарност со „палестинскиот отпор во Појасот Газа“.
Последната тензија ја натера израелската бродска компанија ЗИМ во средата да објави пренасочување на своите бродови од египетскиот Суецки Канал.
Во меѓувреме, меѓународните поморски компании чекаат каков било чекор напред во поморскиот сообраќај низ Црвеното Море, во време кога податоците за бродските компании покажаа зголемување на трошоците за обезбедување бродови што поминуваат преку каналот.
Суецкиот Канал, кој се смета за еден од најважните водни патишта низ светот, е најкратката поморска маршрута меѓу Европа и Азија и еден од главните извори на девизи за Египет.
Минатиот јуни претседателот на Управата на Суецкиот Канал, Осама Рабие, рече дека во фискалната година што завршува на 30 јуни 2023 година каналот остварил приходи во вредност од 9,4 милијарди долари, што е зголемување од 35 отсто во однос на претходната фискална година.
Израел започна немилосрдни воздушни и копнени напади врз Појасот Газа по прекуграничниот напад на палестинската група Хамас на 7 октомври.
Бројот на загинати од израелските напади врз Појасот Газа од почетокот на конфликтот е речиси 15.900, соопшти во понеделникот Министерството за здравство во Газа.
Бројот на ранети во истиот период се искачи на повеќе од 42.000.
Според официјални податоци, бројот на загинати во Израел изнесува 1.200.
