Одлична е мерката за вреднување на трудот и стимулација на здравствените работници, на краток и на долг рок, промовирана вчера од Владата и синдикатите за здравство. Човечкиот потенцијал е столб на секој здравствен систем.
Ова во изјава за КУРИР го истакнува универзитетската професорка и директорка на ТОАРИЛУЦ, Марија Јовановски-Срцева, прашана за коментар по вчера постигнатиот историски договор меѓу Владада и здравствените синдикати.
-Како професорка на Медицински факултет, лично сметам дека валоризирањето на трудот на здравствените работници е посебно важно затоа што тие се херои кои секојдневно се соочуваат со низа предизвици, а во многу случаи секунди се важни за човечките животи. Во состојба како сега, кога имаме недостиг на медицински кадар на секое ниво, па и на Клиниката ТОАРИЛУЦ со која раководам, оваа мерка на кратко и на долг рок во значителна мера ќе значи мотивирање на кадарот и дополнителен стимул, вели докторката.
За КУРИР ексклузивно, таа објави и новини за јубилејна награда и планирана реконструкција.
-За таа цел, токму вреднувајќи ја работата на персоналот можам да информирам дека пред неколку дена потпишав решенија за обезбедување јубилејни награди за вработените кои ги исполнуваат условите, нешто што досега не било случај на нашата клиника. Наредниот период ќе почнеме со активности за подобрување на услугите за пациентите, но и за здравствените работници, токму во инфраструктурниот дел каде што досега од основањето на Клинички центар речиси и да немало воопшто било каква интервенција. Наш императив е вреднување на трудот и високо мотивирани здравствени работници за да ги задржиме на Клиниката, но и во државата. Ја користам оваа прилика да изразам благодарност до сите вработени за максималната заложба, посветеноста и натчовечките напори во секојдневието со кое се соочуваме при извршување на оваа хумана професија, посочи д-р Срцева за КУРИР.
ИЗВОР: kurir.mk
