Речиси извесно е дека во Црна Гора ќе има втор круг претседателски избори во кој влегуваат актуелниот претседател и лидер на Демократската партија на социјалистите, Мило Ѓукановиќ, и заменик-претседателот на движењето ,,Европа сега”, Јаков Милатовиќ.
Ова го покажува проекцијата на резултатите од денешниот прв круг што го прави Центарот за мониторинг и истражување (ЦЕМИ), а врз основа на обработени 85, 5 отсто од нивниот примерок.
За претседател да биде избран денеска треба некој од седумтемина кандидати да освои повеќе од половина од важечките гласови од оние што гласале, што се чини невозможно.
Се очекува неизвесен втор круг пред кој аналитичарите велат дека Ѓукановиќ ќе треба да се обиде да ги мобилизира оние што традиционално гласаат за неговата партија, а денеска останале дома. Ѓукановиќ ќе се бори и за гласовите на кандидатката на Социјалдемократската партија, Драгиња Вуксановиќ Станковиќ, која денеска освојува малку над 3 %.
Од сруга страна, за Милатовиќ се смета дека е поблиску да ја добие поддршката на гласачите на просрпските кандидати Мандиќ и Бечиќ, но дека притоа треба да се види како ќе се постави тој кон овој електорат со оглед на тоа што на 11 јуни ќе се одржат предвремени парламентарни избори на кои неговото движење ,,Европа сега” има големи амбиции.
Како што беше најавено, доколку не се избере претседател денеска, вториот круг избори ќе се одржи за 14 дена, односно на 2 април.
ИЗВОР: 360stepeni.mk
