Потпретседателката на СДСМ Ана Чупеска во синоќешната емисија Клан дебата истакна дека ништо што беше ветено во кампањата не е испорачано од страна на Владата.
Наместо проекти, Чупеска кажа дека Владата тргнала во партизирање на институциите на безбедносниот сектор.
„Многу опасно е тоа што има една отворена тенденција да се окупира безбедносниот систем преку флагрантни повреди на законот при назначувањето на шефот на Агенцијата за национална безбедност. Назначувањето е противзаконски и се чудам зошто ДКСК уште не реагира. Понатаму, Советот кој е одговорен за службите исто така е профилиран по принцип на сериозен партиски учинок, наместо да се конципира како независно тело. Трето, во врска со спојување на службите, иако има некои такви примери и во други земји, ние не смееме да заборавиме што значеше конгрегацијата и масивноста на службите во нашиот контекст. Тие безбедносни служби беа така злоупотребени што 26000 граѓани беа масовно прислушувани, затоа што имавме многу сериозна политичка економска, па и безбедносна криза по тој повод и затоа ако се сеќавате имавме и преговори, дојдоа и Прибе извештаите и договорите од Пржино кои јасно укажаа дека спојувањето е контрапродуктивен, напротив овозможува масовна злоупотреба на човековите права“ посочи таа.
Потпретседателката на СДСМ најави дека СДСМ ќе се спротивстави на секој обид на ВМРО-ДПМНЕ повторно да ги зароби институциите како што тоа го правела во периодот пред 2016 година.
ИЗВОР: racin.mk
