Бројот на жртви во Грција се искачи на 43 – насилни протести во Атина

На протестите попладнево во Атина не требаше да помине многу време за да дојде до тензија и судир со полицијата, а имаше и солзавец, превртени и запалени канти за ѓубре…

Бројот на загинати во железничката несреќа во Грција се искачи на 43, јавија грчките медиуми повикувајќи се на форензичката служба во Лариса.

Додека се бројат мртви и се прави увид на местото на несреќата, во Атина се организираа протести на кои се бараше одговорност.

Протестот започна мирно пред канцелариите на Грчки железници. Според извештаите во грчките медиуми, на протестот учествуваа членови на синдикатите, студентски здруженија и други.

Демонстрантите на почетокот запалија свеќи и седеа на улицата, но потоа беа регистрирани неколку инциденти.

За да дојде до тензија и судир со полицијата, јавува грчката телевизија „Скај“, не требаше да помине многу време, а имаше и солзавец, превртени и запалени канти за ѓубре итн.

Од пред канцелариите на грчките железници, протестот продолжи кон централниот плоштад „Синтагма“ во Атина.

Прерходно, ЕРТ и ТВ „Скај“ јавија дека свртничарот на железничката станица во Лариса ја признал вината за фаталната несреќа што се случи синоќа.

Тој е уапсен и дека пред истражните органи признал оти еден од возовите упатил на погрешна пруга по која од спротивната насока се движел другиот воз. За грешката станал свесен веднаш штом слушнал за несреќата.