„Британските борбени авиони се исклучително софистицирани и потребни се месеци за да се научи како да се управуваат. Со оглед на тоа, веруваме дека не е практично да се испратат тие авиони во Украина. Ќе продолжиме да разговараме со нашите сојузници за она што мислиме дека е вистински пристап“, изјави портпаролот на британскиот премиер
Велика Британија не верува дека е практично да испрати свои борбени авиони во Украина, изјави портпаролот на премиерот Риши Сунак, откако официјален Киев навести дека ќе се залага да добие такви авиони.
„Британските борбени авиони се исклучително софистицирани и потребни се месеци за да се научи како да се управуваат. Со оглед на тоа, веруваме дека не е практично да се испратат тие авиони во Украина. Ќе продолжиме да разговараме со нашите сојузници за она што мислиме дека е вистински пристап“,
додаде тој.
Еден ден откако и САД одбија да ѝ испратат борбени авиони на Украина, заменик-министерот за одбрана на Полска, пак, Војчех Скуркиевич, исто така рече дека можното испраќање полски борбени авиони Ф-16 во Украина не е предмет на „официјални преговори“.
„Засега нема официјални преговори за испраќање полски Ф-16 во Украина. Тоа прашање не постои“,
изјави Војчех Скуркиевич.
Литванскиот претседател Гитанас Наузеда, пак, го повика Западот да ги остави отворени сите опции за барањата на Украина за оружје, вклучително и за испораката на борбени авиони. Тој во интервју за литванска телевизија рече дека борбените авиони и ракетите со долг дострел се „суштинска воена помош во оваа клучна фаза од војната, каде што ќе се случи пресвртната точка“.
Освен САД, и Германија одлучи да не испраќа борбени авиони во Украина, и покрај засилените повици од официјален Киев до западните земји за испраќање борбени авиони и оружје во земјата, со цел подобро справување со руската инвазија.
Извор: 360stepeni.mk
