Премиерот на Велика Британија, Риши Сунак, денеска изјави дека Британија ќе ѝ обезбеди на Украина стотици ракети за противвоздушна одбрана и дополнителни беспилотни воздушни системи, вклучително и беспилотни летала со долг дострел од повеќе од 200 километри, кои ќе бидат испорачани во наредните месеци
Велика Британија не планира да ѝ достави на украинската војска борбени авиони, и покрај навестувањата од Киев дека би ѝ било од големо значење доколку користи борбени летала од типот Ф-16, изјави денеска портпаролот на британскиот премиер Риши Сунак.
„Нема планови за такво нешто“,
изјави портпаролот на Сунак одговарајќи на новинарско прашање дали Велика Британија ќе испрати борбени авиони во Украина.
„Украинците одлучија да обучуваат пилоти на Ф-16, а знаете дека РАФ (Кралските воздухопловни сили) не ги користи“,
рече портпаролот.
Украинскиот претседател Володимир Зеленски денеска е во посета на Обединетото Кралство каде што имаше средба со британскиот премиер Риши Сунак во неговата резиденција во Чекерс во Бакингемшир, каде што, меѓу другото, разговараа и за барањето на Украина за западни борбени авиони.
Инаку, Велика Британија најави дека летово ќе започне со основна обука на украинските пилоти.
Сунак денеска изјави дека Британија ќе ѝ обезбеди на Украина стотици ракети за противвоздушна одбрана и дополнителни беспилотни воздушни системи, вклучително и беспилотни летала со долг дострел од повеќе од 200 километри, кои ќе бидат испорачани во наредните месеци.
„Конфликтот е во клучен момент. Велика Британија ќе остане цврста во својата поддршка за Украина и нејзиниот народ да се бранат… важно е и Кремљ да знае дека ние не заминуваме. Ние сме тука на долг рок“,
рече Сунак.
Кремљ, од друга страна, соопшти дека Русија ја гледа одлуката на Британија да ѝ достави повеќе воена опрема на Украина крајно негативно, но оттаму додаваат оти не веруваат дека помошта на Лондон ќе го промени текот на конфликтот.
Откако ги задржа своите трупи во дефанзива шест месеци, Украина планира да започне голема офанзива за да ја врати територијата користејќи ново оружје кое очекува да го добие од западните сојузници.
Пред денешната посета Велика Британија, украинскиот претседател Зеленски ги посети Париз, Берлин и Рим и се сретна со францускиот претседател Емануел Макрон, германскиот канцелар Олаф Шолц, италијанскиот премиер Џорџо Мелони и други официјални претставници, како и со папата Франциск.
Во неделата Франција, каде што Зеленски се состана со претседателот Макрон, вети дека ќе обучи и опреми повеќе баталјони со десетици оклопни возила и лесни тенкови, вклучително и AMX-10RC, кои често се користат во мисиите за воздушен транспорт.
Во Германија, каде што Зеленски престојуваше пред посетата на Париз, канцеларот Шолц даде гаранции дека неговата земја ќе ја поддржува Украина се додека е потребно и најави нов план за воена помош од 2,7 милијарди евра, вклучувајќи испораки на тенкови, оклопни возила и системи за противвоздушна одбрана.
Поддршката на Берлин за Киев достигна 17 милијарди евра, истакна Шолц.
Досега ниту една земја не се обврза да испорачува борбени авиони, што Киев го бара.
Извор: 360stepeni.mk
