Министерката за енергетика, рударство и минерални суровини, Сања Божиновска, оствари серија значајни средби со меѓународни партнери – претставници на Шведска, Холандија и Marmara Group, со цел унапредување на соработката во областа на енергетиката, одржливото рударство и инвестициите.
На средбата со амбасадорот на Кралството Шведска било разговарано за продлабочување на билатералната соработка, размена на експертиза и поврзување на македонските универзитети со шведските искуства.
Божиновска истакнала дека Шведска претставува пример за технолошки напредно и одржливо рударство, знаење кое, како што нагласила, е од големо значење за земјава.
Со амбасадорката на Кралството Холандија фокусот бил ставен на обновливите извори на енергија и енергетската ефикасност, при што било потенцирано значењето на иновациите, практичните решенија и експертската поддршка во процесот на енергетската транзиција.
Министерката остварила средба и со претставници на Marmara Group, каде се разговарало за можности за инвестиции во соларната енергија, како и за учество на Евроазискиот економски самит – платформа на која, според Божиновска, Македонија може да се позиционира како сериозен и стабилен партнер.
„Македонија сака модерна енергетика, одговорно рударство и чист воздух. Работиме на зелена транзиција, но и на економска стабилност. Работиме на инвестиции, но и на знаење. Работиме на партнерства што носат резултати“, порача Божиновска.
Според неа, продлабочувањето на меѓународната соработка е клучно за обезбедување повисоки стандарди, нови инвестиции и одржлив развој во енергетскиот сектор.
Извор: zurnal.mk
