Борел: Примирјето што го објави Путин е лицемерно

За прекинот на огнот да се смета за валиден, „мора да има целосен прекин на воените напади. Мора да има повлекување на (руските) војници и нивната воена опрема од украинска територија, објасни Борел

Шефот на дипломатијата на Европската унија, Жозеп Борел, го опиша како „лицемерие“ прекинот на огнот што Москва го објави во Украина по повод православниот Божиќ, оценувајќи го како „неверојатен“.

„Кремљ целосно нема кредибилитет и оваа изјава за желбата за едностран прекин на огнот не е веродостојна. Одговорот што ни паѓа на ум на сите нас е скептицизам пред толку многу лицемерие“,

изјави Жозеп Борел за новинарите на маргините на неговата посета на Фез, Мароко.

За прекинот на огнот да се смета за валиден, „мора да има целосен прекин на воените напади. Мора да има повлекување на (руските) војници и нивната воена опрема од украинска територија, објасни Борел.

„Во отсуство на такви конкретни дејствија, едностраниот прекин на огнот изгледа како обид на Русија да купи време да ги прегрупира своите трупи и да се обиде да ја врати својата тешко нарушена меѓународна репутација“,

рече Борел.

Тој, исто така, го впери прстот кон руската „пропаганда“ која за глобалниот скок на цените на храната и енергијата ги обвинува „европските санкции“, што особено ја казнува Африка.

„Тоа е целосно невистина. Руската армија е таа што ги уништи силосите за жито, ги уништи полињата и сееше мини, ги уништи патиштата и ги блокираше пристаништата во Украина“,

нагласи високиот европски функционер.

Рускиот претседател Владимир Путин во четвртокот ѝ нареди на својата армија да го почитува прекинот на огнот „по целата линија на контакт меѓу страните во Украина“ на 6 и 7 јануари, што е прв поголем прекин на огнот од почетокот на руската инвазија пред речиси една година.

Украина и западните сојузници го отфрлија, нарекувајќи го трик на Москва да купи време за испраќање засилување и опрема на источниот фронт.

Звуците на артилериски оган можеа денеска да се слушнат на линијата на фронтот во Украина, откако официјално стапи на сила прекинот на огнот.