ВАШИНГТОН (АА) – Претседателот на Соединетите Американски Држави, Џо Бајден, синоќа соопшти дека владите на Либан и Израел го одобриле американскиот предлог за ставање крај на уништувачкиот конфликт меѓу Израел и групата Хезболах, известува Анадолу.
„Договорот треба да стапи во сила в среда во 4 часот по локално време, а Либанските вооружени сили ќе бидат распоредени и ќе ја преземат контролата врз јужен Либан во следните 60 дена, при што Израел постепено ќе ги повлече своите преостанати сили“, рече Бајден во своето телевизиско обраќање.
Претседателот Бајден рече дека Соединетите Држави, заедно со Франција и другите сојузници, ветиле дека ќе соработуваат со Израел и Либан за да обезбедат аранжманот во потполност да се спроведе.
Тој додаде дека нема да има американски војници на теренот во јужен Либан, но дека, заедно со Франција и другите, тие ќе ја дадат потребната помош за да се осигури дека договорот ќе се спроведе во потполност и ефективно.
Најмалку 55 лица се убиени во израелските напади врз Либан во понеделникот, со што бројот на загинати се зголеми на 3.823 од октомври 2023 година, соопшти либанското Министерство за здравство. Вкупно 160 лица се повредени во последните 24 часа, со што бројот на повредени се искачи на 15.859.
Во последните часови се зголемија израелските воздушни напади врз либанската престолнина Бејрут и неговите јужни предградија, како и врз јужните и источните провинции на Либан, што резултираше со десетици убиени и повредени.
„Трајната безбедност за народот на Израел и Либан не може да се постигне само на бојното поле и затоа го насочив мојот тим да работи со владите на Израел и Либан за да се воспостави прекин на огнот“, додаде Бајден.
Американскиот претседател истакна дека во наредните денови САД заедно со Туркије, Египет, Катар, Израел и други земји ќе направат уште еден обид за воспоставување прекин на огнот во Појасот Газа со цел да се стави крај на израелските напади и да се ослободат заробениците.
Бајден истакна дека Вашингтон останува подготвен да склучи низа историски договори со Саудиска Арабија, кои вклучуваат безбедносен пакт и економски гаранции заедно со кредибилен пат за формирање на палестинска држава и целосна нормализација на односите меѓу Саудиска Арабија и Израел.
Извор: Anadolu Agency (AA)
