Во 7-минутна аудио порака објавена од неговата прес-служба, очигледно гневниот и емотивен Јевгениј Пригожин изјавува дека од него било побарано да „се извини и да биде послушен“ ако сака да добие муниција за неговите борци.
На моменти на снимката Пригожин вика и пцуе, а во еден момент изјавува „не можам да го решам проблемот и покрај сите мои врски и контакти“.
Тој објаснува дека руското воено производство веќе е доволно за да може да ги снабди војниците што се борат на фронтот, а проблемите со снабдување на неговите борци се резултат на свесна одлука.
Јевгениј Пригожин кој цели 20 години владеење на Путин главно беше во сенка, од почетокот на војната излезе во преден план, посебно последниве месеци, откако неговата Вагнер група го предводи контранападот за освојување на Бахмут и околните локации. Неговиот прекар сето ова време е „готвачот на Путин.“
Од почетокот на војната, Пригожин јавно се расправа со генерали и функционери од Кремљ, кои ги обвинува дека не се доволно ревносни во извршувањето на операцијата против Киев.
Најсериозните критики од него се на сметка на руското министерство за одбрана, кого го обвинува дека сакало да си ги присвои успесите на Вагнер. Во една прилика тој ги нарече највисоките руски армиски офицери „копилиња“ кои треба да бидат боси испратени на фронтот со автомати.
Пригожин е и еден од најострите критичари на Шојгу, инсистирајќи дека борците на Вагнер се далеку поефикасни од обичната армија.
И во последната порака тој обвинува дека поединците виновни за недостатокот на муниција „појадуваат, ручаат и вечераат во златни чинии“ и ги испраќаат своите роднини на одмор во Дубаи.
ИЗВОР: off.net.mk
