Кога ќе го видите степенот на штетата, бројот на згради, бројот на станови, бројот на куќи кои се уништени, сфаќате дека ќе треба голем напор да се обнови и ние сме посветени на поддршката на тоа, изјави Блинкен
Шефот на американската дипломатија, Ентони Блинкен, кој е во посета на Турција, изјави дека САД ќе обезбедат дополнителна помош од 100 милиони долари за настраданите од земјотресот во кој загинаа речиси 45 000 луѓе во Турција и во соседна Сирија.
Блинкен, кој дојде од Минхен каде што учествуваше на Конференцијата за безбедност, слета во воздухопловната база Инџирлик во југоисточна Турција и ја изрази американската поддршка на таа земја.
Највисокиот американски дипломат имаше хеликоптерска турнеја на некои од најтешко погодените области заедно со турскиот министер за надворешни работи Мевлут Чавушоглу, а подоцна рече дека е навистина тешко да се каже со зборови уништувањето што го видел за време на турнејата.
„Додаваме 100 милиони долари за да им помогнеме на оние на кои очајно им е потребна помош. Кога ќе го видите степенот на штетата, бројот на згради, бројот на станови, бројот на куќи кои се уништени, сфаќате дека ќе треба голем напор да се обнови и ние сме посветени на поддршката на тоа“,
рече Блинкен, кој со хеликоптер ја обиколи провинцијата Хатај разурната од земјотресот.
Турските власти вчера соопштија дека ја прекинуваат потрагата по жртви освен во две провинции – Кархаманмарас, каде што беше епицентарот на земјотресот и Хатај.
Ден по земјотресот, американските власти испратија неколку тимови за пребарување и спасување во Турција, околу 200 луѓе и ја дадоа првата транша од хуманитарна помош од 85 милиони долари.
Блинкен треба да има средба со турскиот претседател Реџеп Таип Ердоган.
Тоа е прво патување на американскиот државен секретар во Турција откако тој ја презеде функцијата пред две години. Посетата беше закажана пред земјотресот.
Извор: 360stepeni.mk
