Во текот на летото, Макрон го налути Киев велејќи дека западните влади не треба да го „понижуваат“ рускиот претседател. Сепак, во последните денови францускиот лидер стана првиот западен сојузник кој се согласи да испрати западни оклопни возила во Украина, што е голема промена во политиката
Францускиот претседател Емануел Макрон изјави дека „парадоксот“ на Владимир Путин е тоа што тој воопшто не е „непријатен“ човек. Францускиот лидер се појави во саботната епизода на програмата Лес Ренконтрес ду Папотин (Les Rencontres du Papotin), во која новинари со аутизам интервјуираат познати личности.
„Прво, кога ќе го сретнете, тој не е непријатен. Видете, тоа е парадокс“,
рече Макрон во интервјуто снимено на крајот на ноември.
Во текот на летото, Макрон го налути Киев велејќи дека западните влади не треба да го „понижуваат“ рускиот претседател. Сепак, во последните денови францускиот лидер стана првиот западен сојузник кој се согласи да испрати западни оклопни возила во Украина, што е голема промена во политиката, пишува Телеграф.
Во своето новогодишно телевизиско обраќање, Макрон, исто така, им вети на Украинците дека Франција „ќе им помогне да победат“, што е првпат тој експлицитно да одобри победа на Киев на бојното поле.
Украина доби тенкови од советската ера од своите источноевропски сојузници, но украинскиот претседател Володимир Зеленски постојано бараше од Запад понапредни оклопни возила.
Во интервјуто за Лес Ренконтрес ду Папотин, кое беше снимено неколку недели пред неговата голема промена во пристапот кон војната во Украина, Макрон рече дека целта на Путин со инвазијата на Украина е да ја заземе земјата.
„Не мислам дека има нешто што би оправдало започнување војна. Во суштина, тој ја започна оваа војна за да врати територии и да ја прошири територијата на Русија на империјата што некогаш постоела. Тој презеде голема одговорност за себе, за својот народ, очигледно за народот на Украина и за сите нас“,
заклучи францускиот претседател.
Извор: 360stepeni.mk
