ТАМПА БЕЈ (АА) – Ураганот Милтон, кој го погоди копното во подрачјето на Сиеста Ки во Флорида, во Соединетите Американски Држави (САД), зад себе остави големи разурнувања, а оние кои беа евакуирани од регионот почнаа да се враќаат во своите домови, јавува Анадолу.
Според „Вашингтон пост“, Милтон, кој се очекуваше да биде ураганот на векот, според првичните проценки предизвикал смрт на 14 лица.
Ураганот Милтон донесе силни ветрови и дожд низ Флорида и предизвика многу торнада кои зад себе оставија уништување. Властите ги предупредија граѓаните на пораст на нивото на водата и ризик од поплави откако ураганот го напушти регионот.
Продолжија акциите за пребарување и спасување на Флорида, каде загинаа 14 лица. Се стравува дека бројот на жртви може да се зголеми.
Американскиот секретар за внатрешна безбедност Алехандро Мајоркас изјави дека вонредната состојба во земјата продолжува и по ураганот.
„Наша работа е да спречиме зголемување на бројот на загинати“, рече Мајоркас.
Гувернерот на Флорида Рон Де Сантис изјави дека повеќе од 2,5 милиони луѓе се без струја и дека работат на решавање на проблемот.
Официјалните лица најавија дека летовите постепено ќе се обновуваат на државните аеродроми почнувајќи од утринава.
Националната метеоролошка служба (NWS) претходно предупреди дека ураганот Милтон, кој се засилува во Мексиканскиот Залив и се приближува кон Флорида, може да биде „најсилниот“ во последните 100 години.
Наведувајќи дека дале сѐ од себе за да се подготват за ураганот, американскиот претседател Џо Бајден рече:
„Милтон изгледа како ураган на векот“.
Милтон доаѓа по ураганот Хелен, кој неодамна ја погоди Флорида, во кој загинаа 227 лица.
Извор: Anadolu Agency (AA)
