Екипата на Реал Мадрид осми пат е на светскиот трон, овој пат со победа над Ал Хилал со 5-3.
Дуелот во Мароко беше вистински спектакл со хепи-енд за „кралевите“. Уште еднаш се потврди теоријата дека Реал Мадрид игра финалиња за да ги добие, а не само да ги одигра.
Мрежите мируваа 13 минути, а тогаш погоди Винициус за предност на Реал Мадрид. Неколку минути подоцна, Феде Валверде зголеми на 2-0, а надежите на саудискиот клуб кој играше историско финале ги врати Марега во 26. минута. На паузата остана 2-1.
Во период од четири минути, од 54. до 58. минута, Бензема и Валверде донесоа 4-1. Ал Хилал возврати преку Вието во 63. минута (4-2), а високата предност за европскиот првак ја врати Винициус со вториот гол. Последниот погодок во Мароко беше дело на Вието, за конечни 5-3.
Реал Мадрид се врати на тронот по 2018 година кога последен пат беше европски владетел и првак. Со титулата, кралевите ја продолжија европската доминација на СКП која трае од 2012 година, кога последен пат шампион од друг континент беше бразилски Коринтијанс.
ИЗВОР: kurir.mk
