Додик во посета на Москва – утре треба да се сретне со Путин

Српски „Данас“ објави дека претседателот на Република Српска утре треба да се сретне со рускиот претседател Владимир Путин на маргините на средбата со други официјални лица на која, според најавите, можно е да стане збор и за цената на гасот кој Босна и Херцеговина го добива од Русија

Претседателот на Република Српска, Милорад Додик, денеска пристигна во Москва, а утре треба да се сретне со рускиот претседател Владимир Путин, јави „Данас“.

На почетокот на посетата, тој се сретнал и со секретарот на Советот за безбедност на Русија, Николај Патрушев, кој му заблагодарил на Додик за неговата посета и истакнал дека му е драго што претседателот на Република Српска е почесен гостин на 11. меѓународен состанок на високи претставници на безбедносните прашања.

„Многу сме благодарни за вашето учество и сигурен сум дека ќе биде од интерес размената на мислења за безбедносни прашања во современите геополитички услови“,

рекол Патрушев.

Секретарот на рускиот Совет за безбедност нагласил дека во Москва високо го ценат партнерството во духот на довербата, што, како што кажал, е особено меѓу Русија и Република Српска.

„Задоволни сме од развојот на нашите врски кои сè повеќе добиваат стратегиски карактер“,

додал Патрушев.

Српски „Данас“ објави дека претседателот на Република Српска утре треба да се сретне со рускиот претседател Владимир Путин на маргините на средбата со други официјални лица на која, според најавите, можно е да стане збор и за цената на гасот кој Босна и Херцеговина го добива од Русија.

„На состанокот ќе се разговара и за цената на гасот. Можам да кажам дека веројатно ќе биде одобрена најдобрата цена – исто како и за пријателските земји“,

рече Душко Перовиќ, шеф на претставништвото на Република Српска во Русија во изјава за РИА Новости.