Српскиот министер за образование поднесе оставка: Солзите за трагедијата вечно ќе ги носам како печат на душата

Во писмото до премиерката Ана Брнабиќ, тој наведува дека оставката е личен, но и политички чин. Во развиените демократски општества, вели тој, тоа е сила, а во нашиот регион често е одлика на слабост. Но, додава, јавноста нека суди

Српскиот министер за образование Бранко Ружиќ поднесе неотповиклива оставка од функцијата.

Оставката доаѓа неколку дена по масовното убиство во основното училиште „Владислав Рибникар“ на Врачар во Белград во кое 13-годишен ученик уби девет лица (чуварот и осум ученици) и рани седуммина (наставничка и шест ученици).

„Драматичните слики од училиштето, пролиените солзи при изразувањето сочувство на неутешните родители на настраданите деца, доживотно ќе ги носам како печат на душата. Како одговорен и воспитан човек, професионален во извршување на сите досегашни јавни функции, како родител и граѓанин на Република Србија, која секогаш ми е на прво место, а во согласност со членот 23 од Законот за Влада, ја донесов единствената рационална и чесна одлука во оваа ситуација“,
вели Ружиќ кој е кадар на Социјалистичката партија, коалициски партнер на СНС на Александар Вучиќ.

Во писмото до премиерката Ана Брнабиќ, тој наведува дека оставката е личен, но и политички чин. Во развиените демократски општества, вели тој, тоа е сила, а во нашиот регион често е одлика на слабост. Но, додава, јавноста нека суди.