Глобалните цени на храната во јули достигнаа највисоко ниво во последните две години, главно поради растот на цените на месото и растителните масла, покажуваат податоците на Организацијата за храна и земјоделство на ОН (ФАО).
Индексот на цените на основните прехранбени производи на ФАО во јули изнесува 130,1 поен, што е зголемување од 1,6% во однос на јуни и највисока вредност од април 2023 година. Во споредба со јули минатата година, храната е поскапа за 7,6%, иако сè уште е 18,8% пониска од рекордот од март 2022 година.
Цените на растителните масла скокнале за 7,1% во однос на јуни, достигнувајќи највисоко ниво во последните три години. Поскатувањето е предизвикано од растот на цените на палминото, соиното и сончогледовото масло – поттикнати од силна глобална побарувачка и намалени залихи од Црното Море.
Месото поскапело за 1,2%, достигнувајќи рекордни нивоа откако ФАО почна да ги бележи податоците. Најмногу скокнале цените на говедското и овчото месо поради силен увоз од Кина и САД. Живината, исто така, бележи благ раст, додека цените на свинското се намалени поради големи залихи и слаба побарувачка во ЕУ.
Спротивно на тоа, цените на житарките паднале за 0,8% поради добра жетва на пченица, а оризот поевтинел за 1,8% поради обилни извозни залихи. Шеќерот е поевтин петти месец по ред, а млечните производи бележат прв пад од април 2024 година – за 0,1%.
Според ФАО, движењата на пазарот остануваат чувствителни на временските услови и глобалната побарувачка, што значи дека нестабилноста во цените на храната веројатно ќе продолжи и во наредните месеци.
